Министерството за внатрешни работи (МВР) потврди дека синоќа имало обид за опожарување на објект на Еврејската заедница во Македонија, како и на синагогата во Скопје.

Од МВР информираат дека веднаш по пријавата полициски екипи излегле на терен и презеле активности за утврдување на околностите и пронаоѓање на сторителите.

При увидот, во дворот на верскиот објект бил пронајден канистар со гориво, што укажува на намера за предизвикување пожар. На влезната врата се забележуваат видливи траги од горење.

Информациите за инцидентот беа споделени и од Амбасадата на Израел во Северна Македонија, од каде објавија фотографии и видео материјали од местото, вклучувајќи снимки на кои се гледа како две лица скокаат преку оградата и прскаат запалива течност.

Надлежните институции најавуваат дека истрагата е во тек и дека ќе се преземат сите неопходни мерки за целосно расчистување на случајот. Инцидентот предизвика остри осуди од домашната и меѓународната јавност.