Основното јавно обвинителство – Скопје поведе постапка против 40-годишен маж осомничен за тешка кражба на дрзок начин, кривично дело по член 236 став 1 точка 3 од Кривичниот законик.

Според обвинението, на 4 октомври во вечерните часови, спроти катната гаража на улицата „Мирче Ацев“, осомничениот забележал две лица од Валандово додека влегувале во такси возило.

Тој им пришол од зад грб, насилно ја отворил вратата, а потоа со клоци го удрил едниот од оштетените, при што му испаднал мобилниот телефон. Осомничениот го одзел телефонот и побегнал, стекнувајќи противправна имотна корист од околу 6.360 денари.

Поради ризик од бегство и можност за повторување на делото, обвинителството побара од судијата на претходна постапка да му биде определен притвор.
Се наведува дека осомничениот веќе бил повеќепати осудуван за кривични дела против имотот.