Основното јавно обвинителство во Струга формира предмет по повод уривањето на спомен-куќата на Владо Малески, кое се случи за време на градежни активности во нејзина близина.

Според официјалното соопштение, градежните работи ги изведувало лице од струшкото село Велешта. На 16 октомври, јавен обвинител извршил увид на лице место, во присуство на вешто лице од областа на градежништвото, со цел да се утврдат причините и околностите под кои дошло до оштетување на објектот.

„Наредено е вештачење, а се преземаат и други дејствија за испитување на сите релевантни околности под кои се случил настанот,“ соопштија од Обвинителството.

Спомен-куќата на Владо Малески, авторот на текстот на македонската химна „Денес над Македонија“, претставува значаен културно-историски објект во Струга. Нејзиното оштетување предизвика бурни реакции во јавноста и барања за одговорност од институциите.