Рочиштето за случајот „Штекли“, во кој повеќе лица се обвинети за организирана трговија со дрога, денеска беше прекинато и одложено за 9 октомври, откако првообвинетиот Раде Трајковски – Штекли пред почетокот на расправата доби напад налик на епилептичен и падна во судницата.

Екипа на Брза помош изврши лекарски преглед и констатира дека обвинетиот е контактибилен, но самиот изјавил дека „не знае каде се наоѓа“. Тој одбил да ја прими понудената терапија, со образложение дека во затвор примал друг вид лекови, како и да потпише изјава за тоа.

Адвокатот Сашко Дуковски пред Судот нагласи дека нападот е директна последица од неприемена терапија и дека не смее да се толкува како нарушување на редот. „Обвинетиот вчера доби терапија поради суицидални идеи. Ако денеска не ја примил, ваков напад е очекуван исход,“ рече Дуковски и додаде дека одбраната нема интерес да го одолговлекува процесот.

Судијата Илија Трпков истакна дека Судот мора да обезбеди ефикасен и правичен процес, но и да го заштити здравјето на обвинетите. „Во предметот има повеќе обвинети, не само Раде. Но, имајќи предвид дека е крај на денот и има уште многу прашања, главната расправа се одложува за 9 октомври. Секој обид за одолговлекување ќе биде санкциониран,“ рече судијата.