Министерството за внатрешни работи поднесе кривична пријава до Основното јавно обвинителство – Гостивар против двајца полициски службеници од ОВР Кичево, осомничени дека заедно со други лица учествувале во разбојништвото во златарница во Гостивар, при што биле украдени 18 килограми злато.

Според МВР, осомничените полицајци биле лишени од слобода вчера, а против нив е поднесена пријава за кривично дело „разбојништво“ по член 237 став 4 во врска со став 1 од Кривичниот законик.

Истражните органи утврдиле дека на 10 октомври 2025 година, двајцата полицајци, заедно со уште неколку засега непознати лица, го извршиле грабежот во златарницата, при што употребиле физичка сила и закана со огнено оружје.

„Осомничените учествувале во подготовките на грабежот – вршеле извиди на локацијата и следеле како функционира златарницата два дена пред нападот,“ соопштија од МВР.

На денот на грабежот, тие со службено полициско возило го обезбедувале патот за двете возила користени во нападот. Едното возило подоцна било пронајдено запалено на магистралниот пат Гостивар–Дебар, а другото напуштено во Кичево, во близина на сточниот пазар.

МВР и Основното јавно обвинителство Гостивар продолжуваат со мерки и активности за целосно расчистување на случајот, а се трага и по останатите учесници во грабежот.