Унгарскиот премиер Виктор Орбан најави дополнително зајакнување на воената заштита на делот од гасоводот „Турски тек” кој поминува низ Унгарија, по откривањето на експлозив кај Канижа во Србија.

Орбан објави видео изјава на својот Фејсбук профил, во која му се заблагодари на српскиот претседател Александар Вучиќ за „брзата и ефикасна реакција” на српските власти.

„Врз основа на информациите со кои располагаме, планирана беше саботажа на делот од Турски тек во Војводина, кој ја снабдува Унгарија со гас. Се консултирав со претседателот на Србија. Му благодарам на претседателот Вучиќ за работата на српските власти – Србите ја зајакнаа заштитата на гасоводот”, изјави Орбан.

Тој потврди дека гасоводот продолжува да функционира нормално, без прекин.

Инцидентот во Канижа предизвика координиран одговор од Русија, Унгарија, Турција и Србија во однос на засилените мерки за заштита на критичната енергетска инфраструктура.