Европската Унија алармираше за високо ниво на опасниот пестицид метомил во црвени пиперки произведени во Северна Македонија, соопшти Европскиот систем за безбедност на храната (RASFF).

По официјална контрола на пазарот во Хрватска, утврдено е присуство на 0,049 милиграми метомил на килограм, што е пет пати повеќе од дозволената граница од 0,01 mg/kg.

Како резултат на тоа, Европската Унија наложи итно повлекување на производот од продажба. Инспекцијата е спроведена на 23 септември, а официјалното предупредување е објавено на 3 октомври.

Метомилот е инсектицид од типот карбамат, воведен во 1966 година, познат по високата токсичност за луѓето и животните, а може да предизвика сериозни здравствени последици дури и во мали количини.

И додека Европа реагира, во Македонија – молк. Ниту една институција досега не се огласила дали се спроведени контроли, ниту дали е утврдено од каде потекнува контаминираната пиперка.

Кој ќе ја сноси одговорноста за ова?
Зошто токсичната супстанца не била откриена пред производот да замине од земјата?
Кој ја контролира безбедноста на зеленчукот во Македонија – и за извоз, и за домашниот пазар?
Дали некој воопшто води грижа за тоа што стигнува на нашите трпези?

Прашања на кои јавноста сè уште чека одговор.