Пет месеци по правосилната пресуда за автобуската несреќа кај Ласкарци, двајца од осудените – сопственикот на „Дурмо турс“ Дурмиш Белули и транспортниот менаџер Ремзи Мифтари – сè уште не ја започнале десетгодишната затворска казна.

Од Основниот суд во Тетово за „Сакам да кажам“ потврдиле дека и двајцата доставиле медицинска документација поради здравствени проблеми. Белули неодамна бил опериран од хернија на еден тестис, додека Мифтари има исти тегоби на двата тестиси и треба да биде подложен на хируршка интервенција.

За разлика од нив, возачот на автобусот Мануел Трифуновски, кој беше осуден за управување со неисправно возило и невнимание што доведе до удар во заштитната ограда, веќе ја издржува својата затворска казна.

За време на судскиот процес, одбраната на Белули и Мифтари се обидуваше да ја префрли вината исклучиво на возачот. Судот ја отфрли таа аргументација и ги прогласи сите тројца за одговорни за трагичната несреќа во која животот го загубија 16 лица.