Тажна вест ја потресе јавноста во Неготино и целата тиквешка област — по речиси една година неизвесност, пронајдено е телото на 28-годишниот Миле Тодоров, кој исчезна во јануари годинава. Информацијата ја потврди неговата сестра Марија, која со голема болка се збогува со братот.

„Летај со ангелите, Мило наше. Нашите срца ќе останат празни без твојот глас, љубов, добрина, насмевка… Почивај во мир и спокој“, напиша таа.

Од МВР засега нема официјална потврда околу локацијата и околностите под кои било пронајдено телото на Тодоров.

Семејството на Миле со месеци живееше во неизвесност, опишувано како борба помеѓу надеж и очај, додека траеше интензивната потрага по него. Во акцијата беа вклучени стручни тимови, полиција и бројни доброволци од целата околина, но ниту една трага не доведе до конкретен одговор.

Миле исчезна наутро, на денот кога требало да се појави на работа во фирмата „Метал Апостолов“ во Кавадарци. На сопственикот му соопштил дека дава отказ, по што заминал пеш кон Неготино. Последен пат бил забележан кај селото Марена, според снимки од надзорни камери и изјави на очевидци.

Телефонот му беше пронајден во близина на реката Луда Мара, но понатамошните напори да се открие неговата трага не доведоа до резултат — сè до денес, кога семејството ја доби болната вест за неговата смрт.

Јавноста сочувствува со семејството Тодоров, кое ја преживеа најтешката можна година, надевајќи се на среќен епилог кој за жал не дојде.