Холивуд и светскиот филм изгубија еден од своите најголеми имиња. Роберт Дувал почина на 95-годишна возраст, носејќи со себе кариера која се протегаше низ повеќе од шест децении и остави неизбришлива трага во историјата на кинематографијата.

Дувал е добитник на Оскар за најдобра машка главна улога во филмот „Нежно милосрдие” (1983), каде го отелотвори проблематичниот кантри-пејач Мак Слеџ. Во текот на кариерата беше номиниран за Оскар седум пати, а ги освои и наградите БАФТА, четири Златни глобуси и две Еми награди.

Меѓу неговите најпознати улоги се Том Хејген, доверливиот советник на семејството Корлеоне во легендарниот „Кумот“, и поручникот Килгор во воената класика „Апокалипса денес“. Неговата реплика „Го сакам мирисот на напалм наутро” стана една од највечните реченици во историјата на светскиот филм. Блесна и во минисеријата „Осамена гулабица”, „Апостол”, „Судецот” и „Денови на гром”.

Роден во 1931 година во Сан Диего во семејство на американски морнарички офицер, Дувал го избра актерството наместо воената кариера. Се преселил во Њујорк, студирал глума и работел како поштар, а меѓу неговите колеги на студиите биле Дастин Хофман и Џин Хекман. Во филмот дебитирал во 1962 година со улога во „Да се убие птица подбивница”.

Дувал беше женет четири пати, а зад себе ја остави сопругата, аргентинската актерка Лусијана Педраса. Со неговото заминување, светот на киното губи актер кој во секоја улога внесуваше интензитет, автентичност и сила — квалитети кои го прават бесмртен во историјата на кинематографијата.