На 19 ноември во 9:30 часот ќе се одржи првото рочиште за случајот со пожарот во кочанската дискотека „Пулс“, во кој животот го загубија 63 лица, а десетици беа повредени. Од Кривичниот суд – Скопје соопштија дека поканите до странките се веќе во фаза на достава, а судењето ќе се одвива во рамките на Казнено-поправната установа „Идризово“. Предметот ќе го води судијката Диана Груевска-Илиевска, додека судијата Ахмед Идризи ќе биде втор член на судечкиот совет. За ефикасно постапување, веќе се закажани и повеќе термини за главна расправа: 25 и 26 ноември, 2, 4, 10 и 11 декември, а по почетокот на процесот ќе бидат утврдени и дополнителни датуми.

Родителите и блиските на загинатите соопштија дека по добивањето на датумите за рочишта, секојдневните блокади ќе бидат привремено прекинати, но „Маршот за Ангелите“ ќе продолжи секоја сабота во 15:05 часот во Кочани, како симбол на нивната упорност и борба за вистината. „Очекуваме фер, транспарентен и непристрасен процес, во кој секој што има одговорност ќе ја понесе. Нашата болка е вечна, но нашата борба е и за сите идни генерации – никогаш повеќе да не се повтори ваква трагедија“, порачаа од здружението „16 март 2025“.

Денес, кога се навршуваат седум месеци од трагедијата, беше погребан Владимир Блажев – Панчо, фронтменот на групата ДНК, кој по 213 дена лекување им подлегна на повредите од пожарот. Семејствата, пријателите и музичарите му оддадоа последна почит, а неговата смрт повторно ја разбуди болката и прашањето кое се слуша на секој протест: Кој ќе ја понесе одговорноста за 63 изгубени животи?