Поради одбележувањето на верскиот празник Задушница, во сабота од 06:00 часот во Скопје ќе биде воведен посебен режим на сообраќај во близина на повеќе градски гробишта.

Единицата за безбедност на патниот сообраќај при СВР Скопје соопшти дека сообраќајот кон гробиштата Бутел ќе се одвива еднонасочно, во кружен правец. Сите возила ќе се упатуваат по улицата „Бутелска”, потоа лево по „Александар Урдаревски”, лево по „Боца Иванова” и десно до влезот на гробиштата. Излезот е предвиден десно по „Боца Иванова” до кружниот тек на „Бутелска” и лево по „Кемал Сејфула”.

Посебен сообраќаен режим ќе биде воведен и во близина на гробиштата Камник, Драчево и Ѓорче Петров.

МВР апелира до граѓаните да ги почитуваат наредбите на полициските службеници по сообраќајниците опфатени со посебниот режим, со цел непречено и безбедно одвивање на сообраќајот во деновите на одбележување на празникот.