Инцидентот се случи во центарот на Париз, во непосредна близина на хотелот „Матињон“

Пожар избувна денеска во близина на хотелот „Матињон“ во Париз, каде што се наоѓа канцеларијата на премиерот во заминување, Себастијан Лекорну. Во моментот на инцидентот, Лекорну требало да се сретне со лидерот на Сенатот, Жерар Ларшер, и претседателката на Националното собрание, Јаела Браун-Пивет.

На снимки објавени на социјалната мрежа X (поранешен Твитер), се гледа густ црн чад што излегува од страничната врата на бело комбе на компанијата „Сиелис“, која е задолжена за уличното осветлување во француската престолнина.

Според весникот „Ла Паризиен“, полицијата воспоставила безбедносен периметар околу местото на инцидентот, а противпожарните екипи брзо интервенирале.

Од противпожарната служба на Париз соопштија дека пожарот бил изгаснат за кратко време и дека не се проширил на соседните згради. Пожарникарите потврдија дека експлозиите кои се слушнале не биле предизвикани од гас, туку од детонации на мали контејнери со аеросол во возилото.

Според првичните информации, пожарот настанал поради дефект на опрема што се користи за откривање кратки споеви, по што пламенот се проширил низ целото возило. Освен комбето, оштетена е и тендата на блиска продавница.

Нема пријави за повредени лица.