Доколку планирате патување за Божиќ или зимски одмор, експертите предупредуваат на сериозни прекини во европскиот авиосообраќај поради серија најавени штрајкови. Работниците во авијацијата сè почесто ја користат празничната сезона – една од најпрометните во годината – за да извршат притисок за подобри плати и услови за работа, што директно ги погодува патниците.

Од денеска, 17 декември, дел од аеродромските служби, летачките екипажи и контролорите на летање во Италија стапуваат во координиран четиричасовен штрајк од 13:00 до 17:00 часот. Во протестот се вклучени вработени во ENAV (контрола на летање во Рим), персоналот за копнени услуги на најголемите аеродроми, како и вработени во авиокомпаниите Ryanair, Wizz Air, easyJet, ITA Airways, Vueling, Air France и KLM. Иако штрајкот е временски ограничен, се очекуваат доцнења и проблеми во текот на целиот ден.

Најпогодени ќе бидат аеродромите во Милано, Рим, Венеција, Неапол и Катанија. Италијанската Дирекција за цивилно воздухопловство (ENAC) објави листа на загарантирани летови.

Проблеми се најавени и во Велика Британија. Од 19 до 22 декември и од 26 до 29 декември, персоналот за земјени услуги на easyJet на аеродромот Лондон Лутон ќе штрајкува, што може да предизвика доцнења при пријавување и подигање багаж. Дополнително, од 22 до 24 декември и на 26 декември, кабинскиот персонал на „Скандинавски ерлајнс сервисис“ (SAS) ќе престане со работа, што ќе влијае на летовите кон Копенхаген, Стокхолм и Осло.

Во Шпанија, вработените во Azul Handling – партнер за земјена опрема на Ryanair – продолжуваат со редовни штрајкови до 31 декември, што ќе предизвика редици и доцнења на бројни аеродроми, меѓу кои Барселона, Мадрид, Малага, Палма де Мајорка и Тенерифе.

Патниците се советуваат редовно да ги проверуваат информациите од авиокомпаниите и аеродромите и да ги знаат своите права, бидејќи во случај на откажан или значително одложен лет можат да имаат право на алтернативен превоз или финансиски надомест.