Јавното претпријатие „Водовод и канализација – Скопје“ информира дека поради повеќе краткотрајни прекини на снабдувањето со електрична енергија во регионот кај бунарите на Лепенец, дошло до варијации на притисокот во пумпниот систем, што предизвикало дефекти на делови од градската водоводна мрежа.

Како што се наведува во соопштението, истовремено се појавиле два дефекти на главната водоводна линија Ф-600, како и дефект во шахта на Ф-400 на еден од бунарите.

„Поради овие дефекти, во неколку населени места во градот дојде до прекин на водоснабдувањето. По брзата реакција на нашите екипи, снабдувањето постепено се стабилизира со цел да се избегнат нови дефекти и дополнителни оптоварувања на системот“, соопштија од ЈП „Водовод и канализација – Скопје“.

Екипите на претпријатието се на терен и работат интензивно на санација, а нормализирањето на водоснабдувањето се очекува во најкраток можен рок.