На 29 септември 2025 година, во 18:40 часот, на подрачјето на Центар во Скопје, полициски службеници од Единицата за насилен криминал и Единицата за интервентна полиција при СВР Скопје, во координација со јавен обвинител, ги лишија од слобода Е.О. (29) и Е.А. (22), двајцата државјани на Република Турција.

Двајцата биле затекнати при примање 40.000 евра од Х.Џ.Ч. (26), исто така од Турција, со привремен престој во Скопје. Парите претходно биле крим-технички обработени.

Според пријавата поднесена во полиција, Х.Џ.Ч. посочил дека неколку дена бил изложен на закани од лицето Б.О. од Турција, кој живее во Обединетите Арапски Емирати. Тој му се заканувал дека ќе го убие доколку не му исплаќа пари. Пред да се обрати во полиција, оштетениот добил повик од Е.О., кој го известил дека парите треба да му ги предаде нему и дека на средбата ќе дојде заедно со уште едно лице.

Приведените Е.О. и Е.А. се задржани во полициска станица, а по целосно документирање на случајот против нив ќе биде поднесена соодветна пријава.