Министерот за култура и туризам Зоран Љутков информираше дека тендерот за обнова на Универзална сала е поништен поради поднесени жалби од единствениот изведувач кој конкурирал. Според него, жалбата не е од суштинска природа, но Комисијата за жалби сепак го стопирала процесот.

Новиот тендер ќе биде распишан веднаш по истекувањето на законскиот рок од 10 дена – односно следната недела – и ќе трае 30 дена. Љутков очекува до средината на јануари да биде познат новиот изведувач.

За реконструкцијата се издвоени 20 милиони евра за три години. Во 2025 се планирани 15,9 милиони денари, во 2026 година 360 милиони денари, а во 2027 година 450 милиони денари. Целта е Универзална сала да биде завршена до крајот на 2027 година и да биде подготвена за проектот „Скопје – Европска престолнина на културата 2028“.