Демонстрантите излегоа на улиците поради, како што велат, растечката корупција, но и поради убиствата на истакнати личности, вклучувајќи го и атентатот врз градоначалникот на Уруапан.

Најмалку 120 лица, меѓу кои и 100 полицајци, беа повредени во вчерашните антивладини протести во Мексико Сити, соопшти полицијата денес.

Протестите во мексиканската престолнина беа организирани од „Генерацијата З“ поради, како што велат, зголемувањето на стапката на криминал, корупцијата и неказнивоста, како и владата на претседателката Клаудија Шајнбаум, објавува Би-Би-Си. Демонстрантите излегоа на улиците и поради низа убиства со висок профил, вклучувајќи го и атентатот врз градоначалникот на Уруапан, Карлос Манцо.

Демонстрантите мавтаа со транспаренти со пораки како „Сите сме Карлос Манцо“, додека други носеа каубојски капи во знак на почит кон градоначалникот на Уруапан, кој беше застрелан на 1 ноември додека присуствуваше на прославата по повод Денот на мртвите. Манцо беше познат по тоа што зборуваше за бандите вклучени во трговијата со дрога во неговиот град и бараше строги мерки против членовите на вооружените картели кои ја тероризираа земјата.

Демонстрантите демонтираа делови од бариерата што ја штитеше Националната палата, резиденцијата на претседателот на Мексико, а полицијата што го обезбедуваше комплексот испали солзавец кон толпата. Шефот на безбедноста на Мексико Сити, Пабло Васкез, им рече на новинарите дека 20 лица се уапсени за време на протестите, за кривични дела како што се грабежи и напади.

Шајнбаум рече дека протестите, кои се одржале и во други градови, биле финансирани од десничарски политичари кои се противат на нејзината влада.