Првиот пациент од Србија заболeн од малиген меланом во наредните денови ќе ја прими новоодобрената руска персонализирана mRNA вакцина против рак. Како што потврди проф. д-р Владимир Јаковљевиќ од Факултетот за медицински науки во Крагуевац, пациентот веќе отпатувал во Москва, каде ќе ја започне терапијата.

Станува збор за револуционерна вакцина која се создава индивидуално за секој пациент. Процесот започнува со анализа на туморно ткиво, а потоа со помош на алгоритми на вештачка интелигенција се идентификуваат специфични имунолошки цели што се вградуваат во вакцината. Терапијата предвидува десет дози во период од пет месеци, на секои две недели, со цел максимално активирање на имунолошкиот систем.

Критериумите за влез во програмата се исклучително строги и важат само за пациенти кај кои се исцрпени сите стандардни терапии, вклучително и имунотерапијата. Србија е меѓу првите земји што ги упатува своите пациенти на оваа напредна онколошка терапија.

Русија неодамна издаде одобрение за клиничка употреба на новите индивидуални биотехнолошки лекови, но руските власти нагласуваат дека ефикасноста и безбедноста допрва ќе се оценуваат.