Летонскиот претседател Едгарс Ринкевич на панел-дискусијата во рамките на Минхенската безбедносна конференција остро укажа на проблемот со неисполнетите ветувања на Европската Унија кон земјите од Западен Балкан, посочувајќи го конкретно примерот на Северна Македонија. Тој нагласи дека блокот долго време ветувал членство во замена за спроведени реформи, но тие ветувања останале само зборови.

„Ветувавме толку многу работи во замена за реформи, на пример, за промена на името на Северна Македонија. Долго време им ветувавме членство”, изјави Ринкевич, потенцирајќи дека ваквиот пристап го подрива угледот на Унијата во регионот.

Според летонскиот претседател, ЕУ мора сериозно да го разгледа прашањето на Западен Балкан бидејќи постои реална опасност од губење на кредибилитетот во овој регион. Тој истакна дека постои општа согласност за потребата Украина да стане дел од европското семејство, но дека засега нема подготвеност меѓу членките за утврдување конкретни временски рамки.

Неговиот став го потврди и Каја Калас, високата претставничка на ЕУ за надворешна политика и безбедност. Таа отворено призна дека моменталната атмосфера меѓу земјите-членки не овозможува давање прецизен датум за пристапување на Украина во Унијата.

„Моето чувство е дека земјите-членки не се подготвени да дадат конкретен датум. Има многу работа што треба да се направи, а приоритетот е да се преземе акција и да се покаже дека Украина е дел од Европа”, рече Калас на панелот во Минхен.

Дискусијата на Минхенската конференција го отвори прашањето за двојниот стандард на ЕУ — додека од една страна се зборува за итна интеграција на Украина поради геополитичките околности, земјите од Западен Балкан, меѓу кои и Северна Македонија, со децении чекаат на исполнување на дадените ветувања. Ринкевич предупреди дека не треба однапред да се донесуваат заклучоци и дека одредени одлуки треба да ги донесат самите граѓани на засегнатите земји.

Изјавите од Минхен претставуваат редок пример на отворено признавање од страна на високи европски функционери дека процесот на проширување на ЕУ е заглавен, а ветувањата дадени на кандидатите за членство, вклучително и Северна Македонија, досега не се реализирани во конкретни чекори напред.