Генералниот секретар на НАТО, Марк Руте, изјави дека рускиот претседател Владимир Путин е при крај со ресурсите за продолжување на војната против Украина и дека сега е време да се зголеми притисокот врз Русија за постигнување праведен мир.

Изјавата Руте ја даде на прес-конференција по состанокот на Коалицијата на волјата во Лондон, каде што беше оценето дека руската стратегија на фронтот е неефикасна и дека Москва плаќа огромна цена за минимален теренски напредок.

„Во Украина, Путин добива многу малку нова територија на бојното поле, а каде што има маргинални добивки, тие доаѓаат со огромна цена. Стотици илјади Руси умираат поради лудата агресија на Путин. Украина храбро се брани, а нашата поддршка им помага. Вистината е дека на Путин му снемуваат пари, војници и идеи,“ изјави Руте.

Тој нагласи дека моментот е клучен за зголемување на меѓународниот притисок врз Москва, поздравувајќи ги новите пакети воена помош од европските сојузници и Канада, како и одобрувањето на 19-тиот пакет санкции против Русија.

„Развојот на настаните на бојното поле покажува дека нашата поддршка за Украина функционира. Мораме да ја поврземе таа поддршка со санкции и економски притисок врз Русија,“ додаде тој.

Руте изрази оптимизам за западното единство, наведувајќи ги „добрите дискусии“ што се одржаа оваа недела во Вашингтон, Брисел и Лондон, како позитивен сигнал дека меѓународната заедница се движи во вистинска насока за завршување на војната.