На Клиниката за неврологија годишно се евидентираат околу пет илјади нови случаи на мозочен удар, а меѓу пациентите има и се помлади лица — некои дури и на 14-годишна возраст.

Професорката Арсовска од Клиниката за неврологија објаснува дека границата на возраста не е значително поместена во однос на претходните години, но дека класичните ризик-фактори сѐ почесто се присутни и кај популацијата под 45 години.

„Најчести ризици се висок крвен притисок, цигарите, загадениот воздух и кардиоваскуларните заболувања. Клучна е брзата реакција при појава на симптоми како одземање на едната страна на лицето или неразбирлив говор,“ вели Арсовска.

Директорот на клиниката, Јован Божиновски, додава дека проблемот со долгиот период на чекање за снимање со магнетна резонанца ќе се намали откако новиот апарат ќе биде ставен во функција на самата клиника.

Според податоците, мажите на возраст од 60 до 69 години почесто се соочуваат со мозочен удар, но со зголемувањето на возраста ризикот кај жените станува повисок, особено по 70-тата година од животот.