Скопјани повторно мрзнат по станиците: 80 автобуси само на хартија, тендер – никаде

И оваа зима, скопјани ја делат истата судбина – долги чекања, нередовен превоз и студ по автобуските постојки, без јасна најава кога состојбата ќе се подобри. Иако Владата пред повеќе од година и пол најави набавка на 80 нови автобуси, реализација сѐ уште нема, а надежта полека бледее.

Од Владата избегнуваат конкретен одговор кога ќе биде распишан нов тендер за јавна набавка, откако претходниот пропадна. Наместо рокови, јавноста повторно добива општи формулации дека се прават „финални подготовки“ и дека институциите „континуирано работат“ на ветените проекти.

Во меѓувреме, градскиот превоз функционира со сериозен недостиг од автобуси, стар возен парк и проретчен возен ред што често не се почитува. Во зимскиот период, состојбата е уште полоша поради дополнително редуциран сообраќај, оправдан со зимскиот распуст, што најмногу ги погодува вработените граѓани.

Првиот тендер за нови автобуси, распишан минатото лето, беше поништен бидејќи се пријавила само една компанија која не ги исполнувала критериумите. Шест месеци подоцна, нов тендер не е ни на повидок, а надлежните институции веќе не ја споменуваат јавната набавка.

Дополнителен проблем е и долгот на ЈСП „Скопје“ кон приватните превозници, кој изнесува околу 200 милиони денари. Превозниците велат дека со месеци не им се исплатуваат средствата, што директно влијае врз редовноста на линиите, особено во шпицовите на сообраќај.

Граѓаните, пак, сведочат дека некои линии речиси и да не сообраќаат, а чекањето автобус често трае и по половина час, па и подолго. Наместо подобар јавен превоз, скопјани секојдневно се соочуваат со неизвесност, студ и изгубено време.

До реална промена, за жителите на главниот град останува само трпението – и дебелата јакна додека чекаат автобус што можеби ќе дојде.