Соединетите Американски Држави од ноќеска се соочуваат со прва буџетска блокада по шест години, откако Републиканците и Демократите не успеаја да се договорат околу предлог-буџетот. Последниот обид во Сенатот пропадна, што значи дека федералната влада делумно престанува со работа и функционира во вонреден режим.

Иако Републиканците ги контролираат двата дома на Конгресот, во Сенатот за усвојување на буџет потребно е квалификувано мнозинство од 60 гласови. За да обезбедат такво мнозинство, потребни им беа најмалку седум гласови од Демократите – што не се случи.

Демократите го блокираа буџетот поради намалувањата во програмите за здравствена заштита за граѓани со ниски приходи, кои се дел од политиката на Доналд Трамп. Во вторникот вечерта беа ставени на гласање два предлога – еден од Демократите, кој предвидуваше враќање на средствата за здравство, и друг од Републиканците, за привремено финансирање на владата во рок од седум недели. И двата предлога беа одбиени.

Што значи блокадата?

Буџетската блокада подразбира дека сите активности кои не се системски неопходни престануваат. Ќе продолжат да функционираат службите за социјална заштита, здравственото осигурување за постари и лица со попреченост, граничната заштита, полицијата, контролата на воздушниот сообраќај и федералните судови. Воениот персонал останува на должност, но дел од цивилните вработени во Пентагон ќе бидат испратени дома.

Најпогодени се националните паркови – вработените задолжени за безбедност и грижа за животните ќе продолжат да работат, но оние што се грижат за посетителите, турите и одржувањето на инфраструктурата најверојатно ќе останат без работа и плата сè додека не се усвои буџетот.

Последната голема блокада во 2018/2019 година траеше 35 дена, по што беше донесен закон со кој на федералните службеници им се гарантира исплата на заостанатите плати веднаш штом ќе биде усвоен буџетот. Сепак, овојпат постои сомнеж дали правилото ќе важи за сите.

Администрацијата на Трамп наложи на неколку федерални агенции да разгледаат трајни отпуштања, со цел да се намали државниот апарат. Тоа предизвикува дополнителна загриженост кај вработените, кои и онака се соочуваат со неизвесност.

Иако конзервативните кругови ја бранат мерката и бараат отпуштања, јавноста во голема мера вината ја гледа кај Републиканците. Според анкети, 53 проценти од Американците ги обвинуваат нив за застојот, додека само 32 проценти ја гледаат вината кај Демократите.

Аналитичарите предупредуваат дека сегашната блокада може сериозно да им наштети на Републиканците на политички план, особено ако состојбата потрае подолго време.