Спортската сала на Универзитетот „Св. Кирил и Методиј“ – објект во кој државата вложи околу 2,5 милиони евра, шест години стои целосно неизкористен и разурнат. Наместо современ спортски центар за повеќе од 4.000 студенти, салата денес претставува симбол на институционален пропуст и негрижа.

Изградена во 2017 година со цел студентите од Правниот, Економскиот и Филолошкиот факултет да добијат соодветни услови за физичко образование, салата никогаш не беше пуштена во употреба. За краток период, новиот објект прерасна во руина: скршени прозорци, оштетени трибини, уништена подлога и простории претворени во депонии.

По години застој, Министерството за спорт соопштува дека конечно е започната процедурата за реконструкција. Тендерската постапка за избор на изведувач е во тек и, според планот, треба да биде завршена до крајот на годината.

„Откако ќе се избере изведувач, реконструкцијата ќе започне во законски предвидениот рок. Овој објект е приоритетен проект, бидејќи над 4.000 студенти ќе може конечно да одржуваат настава по физичко образование и да спортуваат во современи услови“, велат од Министерството за спорт.

Доколку сè се одвива по план, напуштената сала би можела да се претвори во функционален спортски центар кој конечно ќе ја исполни целта за која беше изграден.