За петти последователен ден, граѓаните на Сараево излегоа на улиците барајќи правда и одговорност по трамвајската несреќа на 12 февруари, во која загина 23-годишниот Ердоан Моранкиќ во близина на Музејот на Сараево, а неколку луѓе беа повредени.

Под мотото „Нема назад, мора да има одговорност” и „Може да бидеме следни — сакаме тоа да се промени”, демонстрантите формулираа четири конкретни барања:

1. Целосна транспарентност — јавно обелоденување на деталите за истрагата, записниците за одржувањето на трамвајот и снимката од моментот на несреќата.
2. Итно повлекување на старите трамваи од сообраќај до нивна повторна инспекција, со јавно известување за резултатите.
3. Оставки на сите одговорни лица во раководствата на јавниот превоз.
4. Долгорочна реформа — изградба на безбеден и квалитетен систем на јавен транспорт ставен во служба на граѓаните, а не во функција на штедење по цена на безбедноста.

Слоганот „Младоста остана на шините” стана симбол на протестот, изразувајќи ја болката по загубениот живот на младиот Моранкиќ.

Организаторите нагласуваат дека барањата не се насочени само кон индивидуална одговорност, туку кон системска промена. Протестите продолжуваат сè додека институциите не дадат конкретни одговори.