Дивата форма на полиовирусот е откриена во примероци од отпадни води во Германија, соопшти Националниот здравствен институт, пренесува „Ројтерс“. Ова е првпат вирусот да биде пронајден во животната средина откако Германија започна систематски мониторинг во 2021 година и повеќе од три децении по последните регистрирани случаи во земјата.

Станува збор за див полиовирус тип 1 (WPV1), пронајден во канализациски примероци, соопшти Институтот Роберт Кох. Нема пријавени случаи на инфекција кај луѓе, а институцијата нагласува дека ризикот за населението останува „многу низок“ поради високата стапка на вакцинација и затоа што се работи за изолиран наод.

Откритието, сепак, се смета за удар врз глобалните напори за целосно искоренување на полиото – болест која може да предизвика тешка парализа или смрт, но е речиси целосно контролирана благодарение на вакцинацијата.

Во светот денес постојат само две активни жаришта на дивиот полио – Авганистан и Пакистан – што го прави германскиот случај исклучително редок и внимателно следен од меѓународните здравствени агенции.