Ако некој некогаш ни кажеше дека на крајот од своите кариери ќе бидат соиграчи, ќе помислевме дека нема поголема глупост — но Серхио Рамос и Лионел Меси поминаа две сезони заедно во Пари Сен Жермен.

Легендарниот Шпанец откри во едно интервју како поминал првиот заеднички тренинг со Меси.

„Кога првпат трениравме заедно, ми пријде и ми рече: ‘Серхио, запомни дека сега сме во ист тим. Не заборавај тоа, немој пак да ме удираш.’ Со насмевка му одговорив: ‘Не грижи се, сега ќе ги тепам сите што ќе ти се приближат.’ Да бидам искрен, понекогаш беше толку тешко да се игра против него, што единствениот начин беше да го удираме. Но, кога првпат одигравме натпревар на иста страна, си помислив: ‘Ова е фантастично, сега можам да бидам толку опуштен — Меси е мој соиграч.’ Без сомнеж, најдобриот играч против кого сум играл,“ изјави Серхио Рамос.

Меси и Рамос пристигнаа во ПСЖ истото лето, 2021 година, кога им истекоа договорите со Барселона и Реал Мадрид. Заедно поминаа две сезони. Освоија две титули во Лига 1, но не успеаја во Лигата на шампионите. Меси ја продолжи кариерата во Интер Мајами, додека Рамос се врати во својата Севиља.