Мајката на загинатиот Андреј Стојанов, еден од 63-те настрадани во катастрофалниот пожар во Кочани, низ солзи упати порака до Венко Крстевски, независен кандидат за градоначалник на Кочани, кој во неделата со трубачи и прослава на улиците го одбележа влегувањето во вториот круг од локалните избори.

Видеото од славјето, на кое се гледа како Крстевски со пари ги дарува музичарите и игра во придружба на трубачи, предизвика бурни реакции на социјалните мрежи.

– „Животот за секого продолжува, но зарем мораше со трубачи и лепење пари да слави? Себичноста и злобата ги видовме. Нашите деца ништо нема да ги врати, иако сакам да верувам дека е некаде отиден и ќе ни се врати,“ изјави мајката на Андреј Стојанов во емисијата „Претрес со Ландов“.

Таа додаде дека за семејствата на загинатите болката не минува, а времето не лекува ништо.

– „За нас времето не значи ништо. Болката за нашиот Андреј не престанува. Сакам само луѓето да покажат почит – барем толку,“ рече таа низ солзи.

Пожарот што се случи во Кочани пред неколку месеци ја потресе целата држава, а многу семејства сè уште ги бараат одговорите за причините и одговорноста за трагедијата што однесе повеќе од шеесет животи.

https://www.facebook.com/share/v/16sTCqADyu/