Скопје утрово се најде на врвот на листата на најзагадени градови во Европа, покажуваат податоците на швајцарската платформа IQAir. Со индекс на загаденост од 101, главниот град е прв во Европа и на 21. место во светот според квалитетот на воздухот.

Веднаш зад Скопје на европската листа се наоѓаат Амстердам и Сараево, што дополнително ја нагласува сериозноста на состојбата со аерозагадувањето во регионот.

Апликацијата „AirCare“ покажува умерена загаденост на ниво на град, но податоците од одделни мерни станици алармираат дека концентрацијата на ПМ-10 честички на одредени локации надминува 200 микрограми на метар кубен, што претставува сериозен ризик по здравјето.

Поради ваквата состојба, на сила се владините мерки за заштита на населението. На работодавците им се препорачува да ги ослободат од работни обврски бремените жени, лицата постари од 60 години и граѓаните со хронични заболувања, како астма, срцев или мозочен удар. За оние кои мора да работат на отворено, се препорачува работното време да се прилагоди во периодот од 11 до 17 часот, кога загадувањето обично е нешто пониско.