Откако Европската радиодифузна унија (ЕБУ) официјално соопшти дека Израел ќе може да учествува на следниот Евровизиски натпревар во Виена, стана јасно дека неколку европски држави ја донеле спротивната одлука — целосен бојкот. Меѓу нив е и Словенија, која остро реагираше на одлуката на ЕБУ.

„Мораме да ги следиме нашите принципи и мислам дека тоа е вистинскиот пат. Понекогаш мора да бидеме на вистинската страна од историјата, а ова е моментот кога сме на вистинската страна од историјата“, изјави претседателката на одборот на РТВ Словенија, Наталија Горшчак, за BBC News.

Словенија не е единствената која се повлекува. Исланд, Ирска, Шпанија, Холандија и Белгија исто така веќе ги откажаа своите настапи на Евровизија 2025 поради присуството на Израел.

Прашањето за учеството на Израел се дискутираше вчера на состанокот на ЕБУ во Женева, но одлуката остана непроменета.

Горшчак потсети дека ЕБУ во 2022 година го исклучи Русија само една недела по агресијата врз Украина, додека сега, како што рече, „не се осмелува да го одбие Израел“.

„На нашите новинари не им беше дозволено — и сè уште не им е дозволено — да влезат во Газа, каде што беа убиени повеќе од 200 новинари. Минатата година видовме дека израелскиот настап беше политички. Не заборавајте дека забранивме сличен настап на руски пејач во Украина“, изјави таа.

„Нашата порака е: нема да учествуваме ако Израел е таму. Во име на 20.000 деца кои загинаа во Газа“, додаде Горшчак.

Нацрт-програмскиот план на РТВ Словенија за следната година покажува дека земјата дури и нема да го емитува натпреварот, што дополнително ја нагласува тежината на нивната одлука.