Семејството на трагично загинатата Теодора Ристовска остро реагираше по одлуката на Апелациониот суд во Гостивар, кој ја потврди двегодишната затворска казна за возачот Менсур Пајазити од село Голема Речица. Тој беше прогласен за виновен за сообраќајната несреќа во која во август 2022 година загина тогаш 22-годишната девојка.

Во писмо до јавноста, семејството ја оцени пресудата како „срам за правдата“ и порача дека казната е минимизирање на трагедијата што ја скрши нивната фамилија.

„Животот на Теодора згасна, а казната изгледа како подбив. Наместо вистинска правда, добивме систем кој со својата блага и селективна казна создава уште поголема недоверба и омраза,“ се вели во реакцијата на семејството.

Тие посочуваат дека обвинетиот повторно се движи слободно и дури седнува зад воланот, без чувство на вина – што за нив претставува „навреда за сеќавањето на Теодора и за секој што изгубил најблиска личност“.

Семејството додава дека нема да молчи и ќе продолжи да ја бара правдата, иако понатамошниот правен пат до Врховниот суд зависи од Јавното обвинителство.

Историја на процесот

• Несреќата се случи на 15 август 2022 година во Тетово, кога возачот управувал „БМВ“ со брзина од 59 км/ч и не му отстапил првенство на пешачки премин на Теодора Ристовска.

• Во ноември 2023 година, Пајазити по признавање на вина првично беше осуден на 3 години и 6 месеци затвор.

• По жалба, Апелацискиот суд ја намали казната на 2 години.

• Врховниот суд ги укина двете пресуди и наложи повторно судење.

• На 7 април 2025 година, во повторениот процес, обвинетиот ја призна вината и повторно беше осуден на 2 години затвор.

• Апелациониот суд во Гостивар сега ја потврди таа пресуда.

„Кога казната е непропорционална со загубата, виновен станува не само сторителот, туку и самиот систем,“ порача семејството Ристовски.