Регулаторната комисија за енергетика (РКЕ) донесе одлука за зголемување на цената на електричната енергија за домаќинствата, по доставено барање од ЕВН Хоум. Поскапувањето ќе стапи на сила од јануари и ќе важи за сите тарифни блокови, а ќе опфати и зголемување на цената на евтината струја.

Како што информира претседателот на РКЕ, Марко Бислимовски, зголемувањето по блокови ќе изнесува од 2,45 проценти во првиот блок, до 3,84 проценти во четвртиот блок, додека цената на евтината тарифа ќе се зголеми за 2,50 проценти.

Бислимовски појасни дека ЕВН Хоум побарал значително поголемо поскапување, во висина од 8 до 9 проценти, но Регулаторната комисија, како што рече, донела одлука за зголемување кое е „реално, оправдано и прифатливо за граѓаните“.

Тој додаде дека укинувањето на надоместокот од 200 денари за мрежарина, што претходно беше најавувано како можност, во овој момент не е оправдано. Според РКЕ, доколку тој надоместок се укине, цената на струјата би пораснала на 2,6 денари по киловат-час, што би предизвикало значително поголемо поскапување, вклучително и зголемување од дури 13 проценти на евтината тарифа.

За домаќинствата, новите цени значат умерено, но сепак осетно зголемување на сметките. Така, за потрошувачка само во првиот блок, сметката во просек ќе порасне за околу 57 денари месечно. За оние што трошат во првиот и вториот блок, зголемувањето ќе биде околу 70 денари, додека домаќинствата кои влегуваат и во третиот блок ќе плаќаат во просек околу 370 денари повеќе месечно. Оваа категорија опфаќа околу 14.000 домаќинства.

Од РКЕ посочуваат дека со ваквата одлука се прави обид да се одржи баланс меѓу финансиската стабилност на енергетскиот систем и заштитата на животниот стандард на граѓаните, во услови на зголемени трошоци и нестабилен енергетски пазар.