На 14 февруари, православните верници го одбележуваат денот на Свети Трифун — светец познат по исцелителните дарби и заштитник на лозарите и лозјата.

Според преданието, младиот Трифун од Кампсада станал познат откако ја излекувал принцезата Гордијана, ќерка на римскиот цар Гордиј. Таа тешко се разболела, а ниту еден лекар не успеал да ѝ помогне. Духот што ја мачел изјавил дека може да биде истеран само од човек по име Трифун. Царот наредил да се пронајдат сите со тоа име, но само младиот Трифун, тогаш на само 17 години, успеал да ја ослободи.

Иако бил богато награден од царот, Трифун одлучил да се врати на својот скромен живот и одгледување гуски, а даруваното богатство го разделил на сиромашните.

Со доаѓањето на царот Декиј започнале нови прогони на христијаните. Трифун одбил да се откаже од верата и бил подложен на тешки мачења, по што бил погубен со отсекување на главата. Неговите мошти подоцна биле пренесени во Цариград.

Во народната традиција, лозарите на овој ден симболично закројуваат барем еден чокот и го полеваат со вино, како симбол на духовен раст и добри дела. Празникот се поврзува и со доаѓањето на пролетта и будењето на природата.