Крзнената играчка Лабубу, која го освои светскиот пазар и стана еден од најбараните производи на кинеската компанија Поп Март, се најде во центарот на сериозен скандал. Невладина организација за заштита на работничките права тврди дека пронашла докази за експлоатација на работници вклучени во нејзиното производство.

Според истрагата на China Labor Watch (CLW), организација со седиште во Њујорк, еден од добавувачите на Поп Март во покраината Џијангси во југоисточна Кина бил вмешан во низа експлоататорски практики. Тие вклучуваат принудување работници да потпишуваат празни договори, ангажирање на малолетни лица на возраст од 16 и 17 години без законски пропишана заштита, како и несоодветна обука за здравје и безбедност при работа.

Истражувачите на CLW три месеци во текот на 2025 година ја следеле состојбата во фабрика со повеќе од 4.500 вработени, интервјуирајќи над 50 работници, меѓу кои и тројца малолетни. Сите тие работеле исклучиво на производство на играчките Лабубу.

Иако кинескиот закон дозволува вработување лица меѓу 16 и 18 години, тоа е дозволено само под посебни услови. Сепак, истрагата покажува дека малолетните работници биле распоредувани на исти производствени позиции како возрасните, со идентични норми и без олеснети услови.

Дополнително, работниците сведочеле дека им биле поставувани нереални дневни цели, при што тимови од 25 до 30 луѓе морале да произведат најмалку 4.000 играчки дневно. Иако законот во Кина дозволува максимум 36 часа прекувремена работа месечно, CLW открила дека работниците често работеле над 100 прекувремени часови месечно.

Скандалот доаѓа во момент кога Лабубу бележи рекордна продажба – само во првата половина од 2025 година линијата на играчки донела 511 милиони фунти, а се очекува нејзината популарност да продолжи и во 2026 година.