Македонската театарска, филмска и телевизиска сцена се прости од актерката Ленче Делова, која почина на 15 февруари на возраст од 77 години. Комеморацијата се одржа во Драмскиот театар во Скопје на 19 февруари, каде семејството, роднините, колегите и почитувачите ја одбележаа нејзината богата кариера преку зборови, спомени, фотографии и видео-снимки.

Делова започна да настапува во Народниот драмски театар уште во 1964 година како аматерка, а професионално беше вработена од 1970 до нејзиното пензионирање во 2013 година. Низ речиси пет децении, таа остави неизбришлив печат на македонската театарска сцена, особено со улогите кои ги изведуваше со длабочина и емоционална искреност.

За своите достигнувања, Ленче Делова доби бројни признанија. Во 1978 година и беше доделена наградата „13 Ноември” за улогата Офелија во „Хамлет”, додека во 1996 година ја освои наградата за најдобра актерска креација на Фестивалот „Војдан Чернодрински” во Прилеп за улогата Трајанка во пиесата „Ни кар – ни зијан”. Во 2006 година, нејзиниот целокупен творечки опус беше одбележан со наградата за животно дело „Војдан Чернодрински”.

Покрај театарската сцена, Делова беше позната и по улоги во македонска филмска и телевизиска продукција, а особено останува запомнета по емисијата „Во светот на бајките”, која ги обележа детските години на повеќе генерации.

На комеморацијата, колегите и пријателите ја опишаа како посветена уметничка со длабока љубов кон професијата, чиј придонес кон македонската култура ќе остане траен. Драмскиот театар, каде таа помина најголем дел од својата професионална кариера, ѝ укажа последна почит.