Во редовните житни производи што секојдневно се консумираат во Европа – леб, тестенини и житарки за појадок – откриени се високи концентрации на токсични „вечни хемикалии“, покажува новото истражување на Мрежата за акција против пестициди во Европа (PAN Europe), пренесува The Guardian.

Анализата открива дека просечните нивоа на трифлуороцетна киселина (TFA), супстанца што е краен продукт на распаѓањето на PFAS-пестицидите, се и до 100 пати повисоки во храната отколку во водата од чешма. PFAS-хемикалиите се широко користени уште од 1950-тите и се познати како „вечни“ поради нивната речиси целосна неразрушливост, што им овозможува да останат во животната средина со стотици години.

TFA е класифицирана како репротоксична супстанција, што значи дека може да предизвика проблеми со плодноста, нарушен фетален развој и оштетувања на репродуктивното здравје. Поврзана е и со нарушувања на тироидната жлезда, црниот дроб и имунитетот – но, и покрај тоа, европските институции сè уште не спроведуваат систематски мониторинг на нејзиното присуство во храната.

Во првата ваква студија на ниво на ЕУ биле анализирани 65 житни производи од 16 земји, при што TFA е откриена во 81,5% од примероците. Највисоки концентрации се регистрирани во:

• житни снегулки од Ирска,

• интегрален леб од Белгија и Германија,

• француски багет.

Контаминацијата е детектирана во широк спектар намирници – шпагети, кроасани, меденки и бројни други производи од пченица.

Активистите бараат итна забрана на PFAS-пестицидите и построги ограничувања за TFA за да се спречи дополнително загадување на синџирот на исхрана.

„Сите сме изложени на TFA преку храната и водата за пиење. Нашите резултати покажуваат дека е неопходна итна забрана за PFAS-пестицидите,“ предупреди Саломе Ројнел од PAN Europe.