Претседателот на САД, Доналд Трамп, откри дека за време на телефонскиот разговор со рускиот претседател Владимир Путин, му ја споменал можноста Украина да добие американски крстосувачки ракети „Томахавк“.

„Го прашав: ‘Дали би имал ништо против ако им дадам неколку илјади Томахавки на твоите противници?’“, изјави Трамп пред новинарите, додавајќи дека Путин „не бил задоволен што ја слушнал таа идеја“.

Разговорот меѓу двајцата лидери се случил пред најавената средба на нивните советници следната недела, а потоа и личната средба меѓу Трамп и Путин во Будимпешта, на која ќе се разгледуваат можностите за постигнување договор околу војната во Украина.

Оваа изјава на Трамп повторно ги разгорува прашањата околу позицијата на Вашингтон кон Москва и потенцијалната употреба на американско оружје како дипломатски притисок во конфликтот што трае повеќе од три години.