Tројца хрватски планинари загинаа во лавина на планината Тошќ во словенечките Јулиски Алпи, и покрај предупредувањата за опасни временски услови.
Според словенечките медиуми, несреќата се случила во неделата, додека групата била на искачување и покрај најавите за студен фронт и обилни врнежи.

Планинарите престојувале во планинарскиот дом Водник, каде што биле предупредени за ризикот од лавини. Тројцата загинати сепак решиле да го продолжат искачувањето, додека останатите членови на групата се спуштиле безбедно кон Покљука.

Во спасувачката акција учествувале тимови од Бохињ, Радовљица и Јесенице, но операцијата била прекината поради лошото време и ќе продолжи во утринските часови.

Хрватскиот премиер Андреј Пленковиќ понудил помош преку тимови на Хрватската горска служба за спасување (HGSS) и хеликоптери, изразувајќи благодарност до словенечките спасувачи за нивниот ангажман.

Словенечките власти предупредуваат дека условите во планините се крајно опасни, со висок ризик од нови лавини, и апелираат до сите планинари да ги одложат искачувањата во следните денови.

Според првичните информации, загинатите потекнувале од Сплит, Солин, Каштел Суќурац и Жрновница.
Трагедијата уште еднаш потсетува на потребата од внимателност и почитување на безбедносните предупредувања при планинарење во зимски услови.