Од Основниот кривичен суд информираат дека предметот поврзан со трагедијата во дискотеката „Пулс“ опфаќа 37 обвинети правни и физички лица, застапувани од 33 бранители. Судот прстот го вперува кон дел од адвокатите и претставниците на правните лица, обвинувајќи дека доцнењето во постапката е резултат на ненавремена достава на судскиот акт, бидејќи тие не биле присутни во своите канцеларии.

„Со оглед дека сите обвинети и нивни бранители веќе го имаат примено обвинителниот акт, на 3 октомври истекуваат законските рокови за приговор. Со тоа се исполнуваат сите услови за оцена, па се очекува актот до крајот на неделата да биде разгледан, за што јавноста и странките ќе бидат навремено известени,“ стои во соопштението од Кривичен суд.

Утре истекува и рокот кој го дадоа родителите на загинатите млади во страшниот пожар. На последниот „Марш за Ангелите“ тие порачаа дека трпението им е при крај и доколку до петок не ги добијат бараните одговори од правосудните органи, тогаш мирните маршеви ќе преминат во протести и блокирање на институциите.

Во меѓувреме, Министерството за внатрешни работи соопшти дека мобилните телефони кои беа вештачени дале нови докази, вклучувајќи и пораки поврзани со „дискотеката на смртта“.

„Сите извештаи од вештачења на мобилни телефони се доставени уште во јуни 2025 година до надлежното јавно обвинителство за понатамошно постапување и одлучување,“ информираат од МВР.

Паралелно, Управата за јавни приходи суспендираше инспектори поради сомнежи за поврзаност со трагедијата, сè додека трае постапката. Истражна постапка се води и против полициски службеници, за која обвинителот Коцевски најави дека наскоро ќе биде поднесен обвинителен акт.