Возачот Васил Јованов, кој во мај ја прегази младата Фросина Кулакова на пешачки премин во Скопје и беше осуден на 12 години затвор, денеска се појави пред Апелациониот суд, барајќи намалување на казната.
Од другата страна, вишата обвинителка Фатиме Фетаи побара построга санкција.

„Уште еднаш сакам да изразам најдлабоко каење и искрено сочувство до семејството на загинатата. Голема грижа на совест имам за тоа што се случи и болката што ја предизвикав,“ изјави Јованов во судницата.

Судијката Александра Ристеска информираше дека во Апелација пристигнале две жалби – една од Обвинителството за повисока казна, и една од одбраната, со барање за поблага пресуда или укинување на првостепената.

„Со вакви возачи, што не почитуваат ниту едно правило, никој не се чувствува безбедно. Против обвинетиот има и други прекршоци – што покажува дека не се одвратил од повторување на делото. Казната мора да биде во горната граница,“ изјави Фетаи.

Бранителот на Јованов, адвокатот Сашко Дуковски, побара намалување на казната, нагласувајќи дека обвинетиот признал вина искрено и безусловно.

„Признанието на вина е доказ за каење и треба да се земе како олеснителна околност,“ рече Дуковски.

По денешната јавна седница, Апелациониот суд ќе ја донесе правосилната пресуда, со што ќе се стави крај на случајот што ја потресе македонската јавност.