Од ВМРО-ДПМНЕ го оценија саботниот протест организиран од Сојузот на синдикати на Македонија и СДСМ како целосен дебакл, тврдејќи дека граѓаните не наседнале на политичките сценарија.

Портпаролот Бране Петрушевски изјави дека граѓаните препознале дека „зад ССМ стои СДСМ” и дека протестот претставувал „очаен обид за спас на лидерите на ССМ и за политичко профилирање на претседателот на синдикатот”.

Петрушевски тврди дека и СДСМ и ССМ ги ставаат сопствените интереси пред правата на работниците, а работниците биле искористени за медиумско внимание наместо за легитимно застапување на нивните права.

„Дебаклот на протестот организиран од СДС и ССМ докажа кој реално мисли и помага на граѓаните”, порача претставникот на владејачката партија, најавувајќи продолжување на активностите за подобрување на животниот стандард и зголемување на платите.