Шест странски државјани — четворица од Турција и двајца од Узбекистан — се лишени од слобода во полициска акција во Скопје, под сомнение за фалсификување на дозволи за престој и други службени документи.

Како што информира Министерството за внатрешни работи, акцијата била спроведена ноќеска, на 21 октомври 2025 година, околу 01:30 часот, од страна на полициски службеници од Одделението за прекуграничен криминал, миграции, странци и реадмисија при Регионалниот центар за гранични работи Север, заедно со Единицата за интервентна полиција при СВР Скопје.

Лишени од слобода се А.З. (30), З.А. (26), Е.С.О. (20) и А.У. (51) од Турција, како и Н.А.Т. (39) и А.Д.М.У. (27) од Узбекистан. Се сомничат за сторен прекршок по член 212 од Законот за странци и кривично дело по член 378 од Кривичниот законик.

При претрес во домот на А.З. во скопската општина Чаир, извршен со судска наредба, полицијата пронашла повеќе дозволи за престој на туѓо име, пари во различни валути и апоени, печати од приватни фирми и државни институции за кои постои сомнение дека се фалсификувани, лаптоп компјутери, турски пасоши на име на други лица и други докази кои упатуваат на извршување кривично дело.

Од МВР соопштуваат дека приведените се задржани во полициска станица и дека по целосно документирање на случајот ќе бидат поднесени соодветни пријави до надлежното обвинителство.