Волонтерски тимови на Црвениот крст на Република Северна Македонија се на терен во село Форино, каде извршуваат проценка на штетите по поплавите. Утврдено е дека најкритична е зоната на селото која гравитира кон реката Вардар.

Проценката открива загрижувачка ситуација: куќите во критичниот дел се изградени на помалку од еден метар од коритото на реката, чиј водостој е на критично ниво. На одредени места реката веќе е излеана, а дополнително — поради зголемениот водостој — се излеале и каналите кои минуваат низ селото, дополнително влошувајќи ја состојбата.

Вкупно 500 објекти се оштетени, при што најголемиот дел се станбени домови. Материјалната штета е значителна, а голем број семејства се соочуваат со сериозни последици.

Волонтерите дистрибуираа хуманитарна помош: поголеми количини флаширана вода — бидејќи водата во селото е заматена и небезбедна за пиење — 250 пакети со прехранбени производи и 250 пакети со хигиенски средства.

Погодените од поплавите можат да побараат психосоцијална поддршка на телефоните 072-239-077 и 072-239-051.