Автомотосојуз на Македонија информира дека од 24 септември 2025 година компанијата „Виадукт Трејд“ од Гостивар започна со санација на потпорни ѕидови кај подпатник на државен пат А2, на обиколница Скопје, на делницата од км 21+840,00 до км 21+987,00. Работите ќе траат четири месеци, за што е воведен изменет режим на сообраќај.

На експресниот пат А2, Крива Паланка – Страцин, кај селото Петралица, исто така е воведен времен режим поради градежни активности. Во текот на денот од 07:00 до 17:00 часот сообраќајот се регулира рачно со знаменца, додека во останатиот дел од денот со светлосна сигнализација – семафори.

Од 3 септември годинава, на делницата Гостивар – Тетово, на потегот меѓу двете патарини, се изведуваат истражувачки градежни работи кои ќе траат две седмици, поради што сообраќајот таму се одвива под времен режим.

Сообраќајот на останатите државни патишта се одвива непречено, иако коловозите се влажни, а интензитетот надвор од градските средини е умерен. На граничните премини од македонска страна нема подолги задржувања при влез и излез од државата.

АМСМ апелира до возачите да ја прилагодат брзината, да ја почитуваат поставената сообраќајна сигнализација и да бидат внимателни, особено на патиштата низ котлини, речни долини и клисури, каде што постои опасност од одрони. Ова особено се однесува на делниците Катланово – Велес, Маврово – Дебар – Струга, Виница – Берово и Кочани – Делчево.

Патниот правец Охрид – Ресен преку националниот парк Галичица, кој беше затворен во зимскиот период, од 17 април 2025 година повторно е пуштен за сообраќај, но само за возила со тежина до 3,5 тони.