По речиси целодневен прекин на водоснабдувањето, во Тетово околу полноќ се очекува нормализирање на дотокот на вода, но Јавното претпријатие за водовод „Шар“ предупредува дека водата не е безбедна за пиење и треба да се користи само за хигиенски потреби и чистење.

Проблемот е предизвикан од интензивните врнежи од дожд кои доведоа до заматување на изворите, поради што двата водоснабдителни системи беа привремено исклучени од мрежата.

Според информациите од ЈП „Шар“, утрово прво била исклучена новата водоводна линија што носи вода од планинските реки во реонот на Лешница, бидејќи водата не можела да се пречисти во филтер-станицата кај Лисец. Попладнето бил прекинат и доводот од изворите на Попова Шапка, исто така поради заматеност.

„Граѓаните се замолуваат водата да ја користат само за хигиена и чистење сè додека не завршат новите лабораториски анализи, по кои јавноста ќе биде информирана за квалитетот на водата,“ соопштија од ЈП „Шар“.

Директорот Ваљон Зеќири изјави дека резервоарот со вода од стариот систем бил исчистен трипати во текот на денот поради високо ниво на заматеност.

Според податоците од хидрометеоролошките служби, во реонот на Попова Шапка денеска се измерени 55 литри врнежи на метар квадратен, а во Тетово – 32 литри.

Во Гостивар, на улицата 18 Ноември, затнати се пет шахти, што претставува ризик од поплавување на неколку куќи. Од Центарот за управување со кризи информираа дека екипи се на терен и работат на прочистување и нормализирање на состојбата.