Со почетокот на сезоната на вируси, во Македонија започна вакцинацијата против сезонскиот грип. Само во првиот ден биле вакцинирани 2.000 граѓани, а процесот се спроведува на 35 вакцинални пункта низ државата, од кои пет во Скопје.

Според податоците на Министерството за здравство, досега се пријавиле околу 49.000 граѓани преку апликацијата vakcinacija.mk, а набавени се 80.000 дози четиривалентна вакцина од холандскиот производител „Абот“.

Министерот за здравство Азир Алиу денеска лично се вакцинираше во Гостивар, на Одделението за епидемиологија, упатувајќи апел до граѓаните навреме да се заштитат:

„Со личен пример сакам да ја истакнам важноста на навремената вакцинација, како најефикасна превентивна мерка за заштита на здравјето. Особено ги повикувам лицата во ризични категории да се пријават преку апликацијата и кај својот матичен лекар,“ изјави Алиу.

Вакцинацијата е бесплатна за ризичните групи: лица над 65 години, хронично болни, здравствени работници, бремени жени, деца од 6 месеци до 5 години и лица сместени во установи за социјална заштита со нивните негуватели.

Министерството потсетува дека вакцината е најсигурна заштита од компликации и ги повикува сите граѓани навреме да се вакцинираат – „Грипот нè чека, заштитете се на време!“