Швајцарскиот град Женева е центар на глобалната дипломатија овие денови. САД и Иран денеска отпочнаа индиректни разговори за решавање на долгогодишниот нуклеарен спор, со посредство на Оман, додека истата американска делегација подоцна ќе учествува и во мировните преговори меѓу Русија и Украина.

Американската делегација ја предводат специјалните претставници Стив Виткоф и Џаред Кушнер. Иранската страна ја застапува министерот за надворешни работи Абас Аракчи, кој претходно се сретна и со шефот на ИАЕА, Рафаел Гроси, и со колегите од Швајцарија и Оман.

Претседателот Доналд Трамп потенцираше дека индиректно ќе биде вклучен во разговорите и изрази оптимизам за позитивен исход. „Подобро да склучиме договор отколку да им пратиме авиони Б-2 да го уништат нивниот нуклеарен потенцијал“, рече Трамп — јасно ставајќи до знаење дека воената опција останува на масата. Иранскиот министер Аракчи оцени дека американската позиција сега е „попреалистична”.

Разговорите доаѓаат по дванаесетдневниот воен конфликт меѓу Израел и Иран во јуни минатата година, во кој Вашингтон интервенираше на страна на Израел. Иран оттогаш ги суспендираше активностите за збогатување на ураниум. Паралелно, Техеран изведе воени вежби во Ормускиот Теснец, а Вашингтон распореди масивна поморска армада во регионот — носачи на авиони, разурнувачи и борбени авиони.

Позициите на двете страни остануваат далеку. Иран инсистира разговорите да опфаќаат само нуклеарната програма и укинување на санкциите. САД, пак, бараат да бидат вклучени и ракетната програма на Техеран и финансирањето на проксилиите на Блискиот Исток.

По нуклеарните разговори, Виткоф и Кушнер ќе останат во Женева за посредување меѓу Русија и Украина. Кремљ потврди дека клучното прашање ќе биде судбината на окупираните украински територии, додека Украина изрази подготвеност за преговори, но претседателот Зеленски предупреди на нови руски напади врз енергетската инфраструктура.