Министерството за внатрешни работи поднесе кривична пријава до Основното јавно обвинителство Скопје против Н.Ј. (47) и Т.И. (58), двете од Скопје, поради основано сомнение за сторени кривични дела „продолжена злоупотреба на службената положба и овластување“ и „малтретирање во вршење на службата“.

Од МВР информираат дека во координација со обвинителството во изминатите два дена биле обезбедени докази кои укажуваат дека осомничените, како сопственички и овластени лица на две приватни установи за згрижување на стари лица, постапувале спротивно на Законот за социјална заштита со цел да прибават незаконска имотна корист, при што потешко ги повредиле правата на корисниците.

Двете установи, во периодот од 2022 година до денес, работеле над дозволениот капацитет, неуредно воделе евиденција за корисници, немале комплетна стручна документација, ниту обезбеден соодветен број стручни кадри. Дополнително, ангажирале лица без валидна документација и не обезбедувале четири дневни оброци согласно правилниците и издадените решенија од Министерството за социјална политика, демографија и млади.

Според МВР, установите месечно остварувале незаконска имотна корист во износ од околу 2,23 милиони денари.

При претресите во домовите на улиците „Рудо“ во Бутел и „Козара“ во Центар, било утврдено дека осомничените во службено својство вршеле физичко и психичко насилство врз корисниците, при што ги изложувале на суров и понижувачки третман. Во домот во Бутел биле сместени 27 корисници, иако дозволата била за 21, а во објектот во Центар 33 лица, иако дозволени биле само 17.

Во собите биле сместувани мажи и жени заедно, дел од лицата спиеле на троседи или по две лица на ист кревет, а оброците им биле подготвувани со производи со изминат рок. Дел од корисниците биле и заклучувани во посебни простории, а некои добивале лекови без лекарска препорака.

По наредба на јавен обвинител, сите згрижени лица биле прегледани од стручни лица од Институтот за судска медицина. Установите се затворени, а со координација на надлежните институции корисниците се префрлени на соодветно сместување.