Skip to content

Ново детско катче на Водно со поддршка од „Филип Морис“: Колку чинеше обновата, не е кажано

1 мин. читање
Сподели
Ново детско катче на Водно со поддршка од „Филип Морис“: Колку чинеше обновата, не е кажано

Водно доби освежување. Градоначалникот на Град Скопје, Орце Ѓорѓиевски, соопшти дека во изминатиот период е уреден влезот кон жичарата, поставено е ново детско катче, обновени се клупите, кантите за отпадоци и летниковците, а дрвените елементи се пребоени.

„За илјадници скопјани, Водно е дел од животот. Тука доаѓаме на прошетка по работниот ден, а за викенд тргнуваме по патеките со семејството и со пријателите“, изјави Ѓорѓиевски. Тој потсети дека претходно е поставен нов асфалт на патот кон Средно Водно, како и ЛЕД-осветлување, за првпат, и дека е изграден моторички парк каде што децата преку игра можат да вежбаат рамнотежа и координација.

Апелот на крајот е разбирлив: „Да внимаваме каде го оставаме отпадот, да ги чуваме дрвјата и сето она што е направено за сите нас.“ Една реченица од соопштението, сепак, заслужува втор поглед. Градоначалникот ѝ заблагодари на компанијата „Филип Морис“ за поддршката во уредувањето. Детско катче на Водно, каде што скопјани одат по свеж воздух, со поддршка од тутунска компанија – иронијата тешко може да се пропушти.

Колку чинеше обновата, колку плати Градот, а колку спонзорот, во соопштението не стои. Новите клупи се тука. Дали скопјани ќе ја дознаат и цената?